धनगढी उप–महानगरपालिका वडा न.–१८, फूलबारी कैलालीमा रहेको फूलबारी क्याम्पस वि.सं २०६६ (सन् २००९) मा स्थापना भएको त्रिभुवन विश्वविद्यालय (त्रिवि) सम्बन्धन प्राप्त सामुदायिक क्याम्पस हो ।  यो संस्था फूलबारी क्षेत्रको उच्च शिक्षाको रूपमा स्थापित एक गैर नाफामूलक संस्था हो । यो एक समुदायमा आधारित सार्वजनिक क्याम्पस हो जुन बुद्धिजीवी, पेशाकर्मी, शिक्षाविद्, व्यवसायी, राजनीतिज्ञ, समाजसेवी, अभिभावक र स्थानीय जनताको संयुक्त प्रयासबाट स्थापित भएको हो । उचित र सुलभ शुल्कमा गुणस्तरीय शिक्षाको पहुँचको माध्यमबाट सभ्यता, उत्तरदायित्व र नैतिकतासहितको ज्ञानको गुण भएका ऊर्जावान, सक्षम र प्रतिस्पर्धी जनशक्ति उत्पादन गर्नु क्याम्पसको मुख्य उद्देश्य हो । शान्तिपूर्ण र शैक्षिक वातावरणका साथ धनगढी शहरको पूर्वी भागमा अवस्थित फूलबारी क्याम्पस धनगढीबाट १८ किलोमिटर पूर्व र कैलारी गाउँपालिका कार्यालयबाट १२ किलोमिटर पश्चिममा अवस्थित छ । फूलबारी क्याम्पसको मुख्य क्षेत्र धनगढी उपमहानगरपालिका वडा नं १४, १८ र १९ र कैलारी गाउँपालिका हो । डोटी, बाजुरा, बझाङ र दार्चुला जिल्ला बाट समेत विद्यार्थी भर्ना हुने गरेका छन् ।

फूलबारी क्याम्पसले शिक्षा संकायमा स्नातक (बीएड) र व्यवस्थापन संकायमा ब्याचलर अफ बिजनेस स्टडिज (बिबिएस) कार्यक्रम सञ्चालन गर्दै आएको छ । आधुनिक शैक्षिक प्रणालीसहितको पूर्ण शैक्षिक वातावरण, र आधुनिक  शिक्षण सिकाइ विधिका माध्यमबाट  गुणस्तरीय शिक्षा  क्याम्पसले प्रदान गर्दै आएको छ । कम्प्युटर ल्याब, फिल्टर गरिएको शुद्ध पिउने पानी, निःशुल्क वाइफाइ इन्टरनेट, पुस्तकालय, क्यान्टिन, साइकल स्ट्यान्ड, पावर ब्याकअप, कम्प्युटराइज्ड एकाउन्टिङ तथा प्रशासनिक प्रणाली, अतिरिक्त क्रियाकलाप, आन्तरिक परीक्षा परीक्षा, मूल्याङ्कन र प्रतिक्रिया, छात्रवृत्ति, शैक्षिक भ्रमण, व्यावसायिक तालीम, शैक्षिक अभिमुखीकरण, विभिन्न खेलकूद तथा अन्य प्रतियोगितामा सहभागिता, प्रयोगात्मक परीक्षा र अन्य सान्दर्भिक शैक्षिक गतिविधि, सुविधा र सेवा उपलब्ध र सञ्चालन गरिएको छ ।